Тіл білімі институты ғалымдары Оксфорд университеті өкілдерімен кездесу өткізді. Ғылым және жоғары білім министрілігінің баспасөз қызметіне сілтеме жасап, «Современное образование» журналы хабарлайды.
Ахмет Байтұрсынұлы атындағы Тіл білімі институтына Нархоз университетінің ректоры Мирас Дәуленов пен Оксфорд университеті Азия және Таяу Шығыс зерттеу факультетінің жетекшісі Лейла Наджафзада арнайы келіп, ғалымдармен кездесу өткізді.
Кездесу барысында екіжақты мәселелер сөз болды. Лейла Наджафзада өзі жетекшілік етіп отырған факультеттің қызметі туралы айтып, түркі тілінің бірі ретінде қазақ тіліне қызығушылық білдіріп отырғанын айтты. Қазақ тілін оқытуды қолға алуды да жоспарлап жүргенін жеткізді.
Тағы бір маңызды жайт, алдағы уақытта институттың жас ғалымдары «Болашақ» тағылымдамасы аясында Оксфорд университетіне барып, білім алуы мүмкін.
«Қаржы мәселесі жағынан кедергі болмаса, біз өз тарапымыздан барлық жағдайды жасауға, шақыру жіберуге дайынбыз. Екі жақты ынтымақтастықты арттыруға күш саламыз», - деді Лейла Наджафзада.
Тарихи кездесуге мұрындық болып отырған қос тарап барлық мүмкіндікті қарастыруға дайын.
Comments