Ғылым және жоғары білім министрі «Қазатомөнеркәсіп» басшысымен кездесті

Ғылым және жоғары білім министрлігінде ғылым және жоғары білім министрі «Қазатомөнеркәсіп» ҰАК» АҚ Басқарма төрағасы Мейіржан Юсуповпен кездесті. Күн тәртібінде ғылыми-технологиялық сессияның қорытындысы шығарылып, ғылым мен технология саласындағы ынтымақтастықтың келешегі талқыланды.

Кездесу барысында 2024 жылғы қыркүйекте Қызылордада «Қазатомөнеркәсіп» ҰАК» АҚ қолдауымен ұйымдастырылған ХҚКО ғылыми-технологиялық сессия нәтижелері туралы есеп ұсынылды. Іс-шарада сирек кездесетін металдарды алу технологияларын әзірлеу, жабдықты тозудан және коррозиядан қорғау, сондай-ақ ион алмасу сорбциясы процестерінің тиімділігін арттыру сияқты өзекті ғылыми-өндірістік міндеттер шешілді. Іс-шара қорытындысы бойынша 25 тапсырма ұсынылды, 6 прототиптік шешім жасалды және 2 техникалық тапсырма дайындалды.

Негізгі нәтижелердің бірі уран алудың тиімділігін арттырудың экологиялық тұрақты әдістерін, сондай-ақ күрделі тау-кен-геологиялық жағдайларда уранды жерасты шаймалаудың инновациялық әдістерін әзірлеуге арналған техникалық тапсырма болды.

Кездесу барысында «Қазатомөнеркәсіп» ҰАК» АҚ-ның ғылыми-техникалық қызметі таныстырылды және ғылыми қоғамдастықпен одан әрі өзара іс-қимыл жасау бағыттары айқындалды.

Кездесу соңында ғылым және жоғары білім министрлігі мен «Қазатомөнеркәсіп» ҰАК» АҚ арасындағы ынтымақтастық туралы меморандумға қол қойылды, сондай-ақ сессия қатысушыларын отандық ғылым мен технологияларды дамытуға қосқан үлесі үшін алғысхаттармен марапаттау рәсімі өтті. Құжат ғылым мен уран өнеркәсібі арасындағы өзара іс-қимылды нығайтуға бағытталған, бұл ғылыми-инновациялық технологияларды енгізуге және стратегиялық маңызы бар салаларды дамытуға ықпал ететін болады.

Министр С.Нұрбек мұндай іс-шаралар ғылым мен бизнестің күш-жігерін біріктіру үшін тиімді платформа құратынын, бұл Қазақстанның жаһандық аренадағы бәсекеге қабілеттілігін арттыру контекстінде ерекше маңызды екенін атап өтті.