Мұнайлы өңірде «Atyrau Energy Challenge» байқауы мәресіне жетті, деп хабарлайды 24.kz. Байқауға Қазақстанның әр өңірінен 100-ден астам ақпараттық технология мамандары өтініш берген болатын.
Солардың ішінен 42 жоба іріктеліп, 10 жоба үздік деп танылды. Байқауға қатысқан жобалардың ішінде еңбек қауіпсіздігі, экология, құжат айналымындағы қағазбастылықтан арылу және оларды сақтау технологиясына арналған жобалар бар. Сосын мұнай-газ өнеркәсібі мен құрылыс саласына сандық технологияларды енгізу туралы да тың ұсыныстар болды. Сараптау қорытындысына сай 4 жоба үздік аталып, жүлдеге тігілген 10 мың АҚШ долларын өзара бөлісті.
Раушан Найзабаева, байқау ұйымдастырушысы:
- Атырауда қабілетті жастар өте көп. Олар әсіресе ақпараттық технология саласында ерекше көзге түсіп жүр. Сондықтан біз елордада орталық құрып, сандық технологиялар жүйесін жасақтаймыз. Бұл биылғы жастар жылы аясындағы ең елеулі шара болмақ.