Coursera Learning Excellence Award 2026: Қазақстан цифрлық білім беру көшбасшыларының қатарына кірді

Қазақстан Республикасының Ғылым және жоғары білім министрлігі цифрлық оқытуды дамытудағы үздік жетістіктері үшін берілетін халықаралық сыйлық – Coursera Learning Excellence Award 2026 жүлдесін иеленді. Бұл туралы «Қазіргі білім» журналы Саясат Нұрбектің Telegram-арнасына сілтеме жасап хабарлайды.

«Бұл – білім беру, цифрлық құзыреттер және жасанды интеллект салаларында біз жүйелі түрде атқарып келе жатқан үлкен жұмыстың мойындалуы, – деп жазады Қазақстан Республикасының Ғылым және жоғары білім министрі. – Мен үшін бұл марапат ерекше қымбат, өйткені оның артында мемлекеттік саясат, халықаралық серіктестік және жаңа білім беру технологиялары ғана емес, адамдар тұр. Әлемнің үздік оқытушыларынан білім алуға, сұранысқа ие мамандықтарды меңгеруге, өз жолын өзгертуге және өз болашағын құруға мүмкіндік алған жүздеген мың қазақстандық жастар тұр.

Ауқымын бір елестетіп көріңіздер:

– 292 мыңнан астам білім алушы Coursera сертификаттарын алды.

– Алынған сертификаттардың жалпы саны 682 мыңнан асты.

– Қазақстандықтар оқуға 5,35 миллионнан астам сағат жұмсады.

– 163 мың академиялық кредит университеттеріміздің білім беру бағдарламаларында есепке алынды.

– 2026 жылы елдің 100 жоғары оқу орнына 38 184 лицензия бөлдік.

Осы сандардың әрқайсысының артында біреудің жаңа құзыреті, алғашқы кәсіби мүмкіндігі, жеке жобасы немесе болашақ стартаптың идеясы тұр.

2022 жылы Coursera-мен ынтымақтастықты бастағанда, алдымызда үлкен мақсат тұрды: сапалы халықаралық білімді қазақстандық студенттерге қолжетімді ету және оны ұлттық жоғары білім беру жүйесіне кіріктіру. Бүгін бұл шешімнің жұмыс істеп тұрғанын көріп отырмыз.

Цифрлық білім енді жекелеген студенттерге арналған қосымша мүмкіндік емес екені аса маңызды. Ол еліміздің білім беру экожүйесінің бір бөлігіне айналып барады.

2025 жылы маған Coursera Learning Hero Award сыйлығы берілді. Бүгінгі Coursera Learning Excellence Award 2026 – бүкіл командамыздың, университеттердің, оқытушылардың және ең бастысы, студенттердің өздерінің жүйелі жұмысын мойындау.

Coursera-дағы халықаралық серіктестерімізге сенімдері мен бірлескен жұмыстары үшін ерекше алғыс айтқым келеді. Сондай-ақ қазақстандық білімді күн сайын заманауи әрі бәсекеге қабілетті етуге үлес қосып жүрген барлық адамдарға алғысымды білдіремін.

Бірақ біз үшін ешбір халықаралық марапат тоқтауға себеп емес. Керісінше, бұл – қосымша жауапкершілік және алға жылжуға түрткі. Мен былай деп сенемін: XXI ғасырда мемлекеттің басты бәсекелік артықшылығы табиғи ресурстар емес, азаматтарының білімі, зияты мен қабілеті болады.

Біздің міндетіміз – Қазақстанның кез келген өңірінен шыққан жас адамның әлемдік деңгейдегі білімге қолжетімділігін қамтамасыз ету, оның технологиялар жасап, өз бизнесін бастап, жаһандық нарықта бәсекелесе алуына жағдай жасау. Біз дәл осындай білім беру жүйесін құрып жатырмыз», – деп түйіндейді Саясат Нұрбек.