Kozybayev University ғалымдарының әзірлемесі Солтүстік Қазақстан жолдарында сынақтан өтеді

Солтүстік Қазақстан облыстық филиалының «ҚазАвтоЖол» ҰК» АҚ-да Kozybayev University ғалымдарының ғылыми әзірлемесін өңірдің жол саласына енгізу перспективаларына арналған жұмыс кездесуі өтті.

«Химия және химиялық технологиялар» кафедрасының меңгерушісі Юлия Бызова асфальтбетон қоспасының құрамында пайдаланылған АГ-4И герметигін қолдану жобасын таныстырды. Ұсынылып отырған шешім өнеркәсіптік қалдықты функционалдық қоспа ретінде қайта пайдалануды көздейді. Оның құрамдас бөлігі жол жамылғысының беріктігін, суға төзімділігін және ұзақ мерзімділігін арттыруға мүмкіндік береді.

Талқылауға Kozybayev University басқарма төрағасы – ректоры Ербол Исакаев, «ҚазАвтоЖол» ҰК» АҚ Солтүстік Қазақстан облыстық филиалының басшылығы, Солтүстік Қазақстан облысы бойынша Жол активтерінің сапасы ұлттық орталығының, Солтүстік Қазақстан облысының жолаушылар көлігі және автомобиль жолдары басқармасының өкілдері, «ҚАЖсервис» ЖШС және жол кәсіпорындарының мамандары қатысты.

Кездесу қорытындысы бойынша тараптар технологияны тәжірибелік сынақтан өткізуге кірісу туралы уағдаласты. «ҚазАвтоЖол» ҰК» АҚ Солтүстік Қазақстан облыстық филиалының директоры Талғат Смағұлов модификацияланған асфальтбетон қоспасын төсеу үшін автомобиль жолының тәжірибелік учаскесін анықтауға дайын екенін білдірді.

Қажетті зертханалық сынақтарды Солтүстік Қазақстан облысы бойынша Жол активтерінің сапасы ұлттық орталығы зертхананың техникалық мүмкіндіктері шегінде ақысыз негізде жүргізеді. Келесі кезеңде зертханалық зерттеулер жүргізіліп, асфальтбетон қоспасы тәжірибелік учаскеге төселеді. Одан кейін жол жамылғысының жағдайына мониторинг жүргізіліп, технологияның нақты пайдалану жағдайларындағы тиімділігі бағаланады.

Қол жеткізілген уағдаластықтар Kozybayev University ғалымдарының зерттеу нәтижелерін тәжірибеде қолдануға бағытталған маңызды қадам болды. Жобаны іске асыру технологияның нақты жол пайдалану жағдайларындағы тиімділігін бағалауға мүмкіндік береді.