Әлемдік стандарттарға жету жолында: Қазақстанның техникалық және кәсіптік білімін дамытудың халықаралық векторы

Халықаралық ынтымақтастық Қазақстанның техникалық және кәсіптік білім беру жүйесін дамытудың негізгі бағыттарының біріне айналып отыр. Бүгінде сөз тек тәжірибе алмасу немесе қысқа мерзімді шетелдік сапарлар туралы ғана емес. Қазақстандық колледждер халықаралық білім беру және кәсіби кеңістікке дәйекті түрде интеграцияланып келеді: шетелдік білім беру ұйымдарымен және кәсіпорындармен серіктестік байланыстарын кеңейтеді, халықаралық салалық стандарттарды енгізеді, академиялық ұтқырлықты дамытады, халықаралық чемпионаттарға қатысады және жаһандық еңбек нарығында біліктіліктердің танылуы үшін жағдай жасайды.
Бұл бағыттың басты міндеті – ұлттық экономиканың талаптарына да, халықаралық сапа стандарттарына да жауап беретін мамандарды даярлаудың осындай жүйесін қалыптастыру, ал түлек Қазақстанда немесе оның шегінен тыс жерде жұмыс істеуіне қарамастан бәсекеге қабілетті болуы.
Серіктестік келісімдерден нақты білім беру мүмкіндіктеріне
Халықаралық ынтымақтастық динамикасының көрсеткіштерінің бірі – шетелдік серіктестер желісінің тұрақты кеңеюі.
2025 жылы Қытай, Түркия, Оңтүстік Корея, Жапония, Франция, Швейцария, Германия, Ұлыбритания, Ресей, Қырғызстан және таяу және алыс шетелдің басқа да елдерінің білім беру ұйымдарымен және кәсіпорындарымен 150-ден астам меморандум мен келісім жасалды.
Бұл үрдіс 2026 жылы да сақталып отыр. Тек бірінші жартыжылдықта қазақстандық колледждер шетелдік колледждермен және ұйымдармен шамамен 80 меморандум мен келісімге қол қойды.
Бұл ретте халықаралық ынтымақтастықтың бірте-бірте формалды байланыс орнатудан нақты білім беру тетіктеріне көшетіні маңызды.
Сөз студенттер мен педагогтердің академиялық ұтқырлығы, халықаралық салалық аккредиттеу, кадрларды бірлесіп даярлау, өндірістік практика, оқытушылар алмасу және бірлескен білім беру жобаларын іске асыру туралы болып отыр.
Серіктестіктер ең алдымен ел экономикасы үшін стратегиялық маңызы бар бағыттар бойынша құрылады: құрылыс, ақпараттық технологиялар, энергетика, машина жасау және металлургия, тау-кен өнеркәсібі, ауыл шаруашылығы, көлік және логистика, қонақжайлылық саласы және басқа да салалар.
Осылайша, ТжКБ жүйесіндегі халықаралық күн тәртібі еңбек нарығының қажеттіліктерімен және экономикалық даму міндеттерімен тікелей байланысты.

Академиялық ұтқырлық: құнды халықаралық тәжірибе
Халықаралық интеграцияда академиялық ұтқырлық ерекше орын алады. 2025 жылы колледж студенттері мен педагогтерінің академиялық ұтқырлығын ұйымдастыру мүмкіндігі заңнамалық деңгейде бекітілді. Бұл маңызды қадам, өйткені халықаралық ұтқырлық жүйелі білім беру саясатының бөлігіне айналды.
Халықаралық тәжірибе ТжКБ жүйесінің педагогтері үшін ерекше маңызды. Дәл арнайы пәндер оқытушысы мен өндірістік оқыту шебері даярлау мазмұнының заманауи өндіріс талаптарына қаншалықты сәйкес келетінін айқындайды.
Шетелдік тағылымдама педагогке заманауи өндірістік процестерді көруге, жаңа технологиялармен және кадрларды даярлау әдістемелерімен танысуға, жұмыс берушілердің талаптарын зерделеуге, содан кейін бұл тәжірибені өз колледжінің білім беру процесінде пайдалануға мүмкіндік береді.
2025 жылы 10 колледжден 150-ден астам студент Түркия, Қытай, Франция, Испания, Оңтүстік Корея, Ұлыбритания, Германия, Швейцария, Қырғызстан және Өзбекстанда оқудан және тағылымдамадан өтті. Олар қоғамдық тамақтану, сервис, IT, энергетика, инжиниринг, дизайн, автомеханика және басқа да мамандықтарды меңгерді.
Сонымен қатар педагогтердің халықаралық ұтқырлығы кеңеюде. Мәселен, Н. Бекбосынов атындағы Маңғыстау энергетикалық колледжінің төрт арнайы пән оқытушысы мен алты студенті 2025 жылы Францияда үш мамандық бойынша тағылымдамадан өтті.
Тағы бір мысал – қазақстандық колледждердің 20 оқытушысының Қытайдың Ухань қаласындағы Бағдарламалық жасақтаманың кәсіби инженерлік колледжінде тағылымдамадан өтуі. Педагогтер заманауи оқыту әдістемелерін, бағдарламалық жасақтаманы әзірлеу технологияларын және жасанды интеллекті зерделеді, IT және өндірістік компанияларға барды. Қорытындысы бойынша олар практикалық бағалаудан өтіп, халықаралық сертификаттар алды. Мұндай формат ТжКБ жүйесі үшін ерекше маңызды, өйткені педагогтерге жаңа технологиялардың тікелей өндірісте қалай қолданылатынын көруге және студенттердің практикалық оқуын ұйымдастыру кезінде мұны ескеруге мүмкіндік береді.
Алматы облысында 2025 жылы колледждің сегіз педагогі шетелдік тағылымдамадан өтті: бесеуі – Түркияда, үшеуі – Францияда. Алынған тәжірибе заманауи білім беру технологияларымен, оқыту әдістемелерімен және білім мен өндірістің өзара іс-қимылымен байланысты болды. Болашақта педагогтер алған білімдерін студенттермен жұмыста пайдаланады.
2026 жылдың басынан бастап 189 студент пен 132 педагог, оның ішінде 91 арнайы пән оқытушысы мен 41 өндірістік оқыту шебері шетелдік тағылымдамадан өтті. Бұл көрсеткіштер ТжКБ жүйесінде халықаралық тәжірибенің кеңеюін көрсетеді.
Нәтижесінде кәсіби дамудың жаңа моделі қалыптасады: педагог халықаралық тәжірибемен танысуға мүмкіндік алады, заманауи технологиялар мен оқыту әдістерін меңгереді, содан кейін алған білімдерін студенттерге және әріптестеріне жеткізеді. Осылайша академиялық ұтқырлық кадрларды даярлаудың мазмұны мен практикасын жаңарту құралына айналады және ТжКБ жүйесін заманауи экономиканың өзгерістеріне тезірек бейімдеуге мүмкіндік береді.

Халықаралық практика: оқу колледж шегінен шыққанда
Халықаралық ұтқырлық нақты өндірістік практикамен байланысты болған жерде ерекше тиімді.
Көрнекі мысал – Алматы мемлекеттік бизнес-колледжінің тәжірибесі. Оның студенттері Түркияның Анталья жағалауындағы бес жұлдызды қонақүйлерде өндірістік практикадан өтіп, қонақжайлылық индустриясының халықаралық стандарттарына сәйкес кәсіби дағдыларын жетілдіреді.
Соңғы бес жылда мұндай мүмкіндікке 86 студент қол жеткізді, ал 2026 жылы тағы 21 студент шетелдік практикадан өтуде.
Практикалық даярлау аспазшының көмекшісі, бармен-бариста және қонақжайлылық саласының басқа да мамандықтары бойынша ұйымдастырылған. Студенттер нақты жұмыс процестеріне қосылып, халықаралық қызмет көрсету стандарттарымен танысады және сала кәсіпқойларымен өзара іс-қимыл тәжірибесін алады.
Маңызды артықшылық – практика ақылы негізде ұйымдастырылған: студенттерге айына кемінде 400 мың теңге төленеді.
Бірақ мұндай практиканың маңызы қаржылық құрамдас бөліктен әлдеқайда кең. Студент білімін нақты кәсіби ортада қолдануға, шет тілін жетілдіруге, жаңа мәдени ортаға бейімделуге және халықаралық кәсіби байланыстар қалыптастыруға мүмкіндік алады.
Түркияның туристік саласындағы кәсіпорындармен осындай ынтымақтастық форматы бойынша Қазақстанның тиісті бейіндік бағыттары бар басқа да колледждері өзара іс-қимыл жасайды.

Халықаралық чемпионаттар: құзыреттерді жаһандық деңгейде тексеру
Халықаралық интеграцияның тағы бір маңызды бағыты – кәсіби шеберлік чемпионаттары. Олар қазақстандық студенттердің даярлық деңгейін басқа елдердің қатысушылары көрсететін кәсіби талаптармен және құзыреттермен объективті салыстыруға мүмкіндік береді.
2025-2026 жылдары қазақстандық колледждердің студенттері WorldSkills қозғалысы аясында өткен халықаралық кәсіби шеберлік жарыстарында бірқатар маңызды нәтижелерге қол жеткізді.
Ең көрнекті оқиғалардың бірі Ақтауда өткен TurkicSkills 2025 халықаралық чемпионаты болды. Қазақстандық команда алты алтын медаль, сондай-ақ күміс медальдар мен ерекшелік медальонын жеңіп алып, жарыстың абсолютті көшбасшысы атанды.
Алтын наградаларды қазақстандық қатысушылар дәнекерлеу технологиялары, электромонтаж жұмыстары, сантехника және жылыту, сән технологиясы, графикалық дизайн және жеңіл автомобильдерге қызмет көрсету және жөндеу сияқты құзыреттерде алды.
Жеңімпаздар арасында қазақстандық колледждердің студенттері, оның ішінде Алматы құрылыс-техникалық колледжінің, Талдықорған жоғары политехникалық колледжінің және Қостанай жоғары автомобиль көлігі колледжінің студенттері болды.
Данияда өткен EuroSkills Herning 2025 чемпионаты да қазақстандық қатысушылар үшін табысты болды. Қазақстандық құрама жоғары кәсіби шеберлік деңгейін көрсеткен қатысушыларға берілетін жеті Medallions for Excellence – ерекшелік медалін жеңіп алды. Марапатталғандар арасында Астана, Ақтөбе және Қазақстанның басқа да өңірлерінің колледждерінің өкілдері болды.
«Astana Polytechnic» жоғары колледжінің студенті Нұрлан Рамазанның табысы тағы бір жарқын мысал бола алады. Австралиядағы «Global Skills Challenge Australia 2026» халықаралық чемпионатында ол «Мехатроника» құзыреті бойынша алтын медаль жеңіп алды. Сонымен қатар, чемпионаттың «Best of Nation» арнайы наградасына ие болды. Осы колледждің тағы бір студенті «Графикалық дизайн» құзыреті бойынша сәтті өнер көрсетіп, қола медаль жеңіп алды.
Қыркүйек айының соңында өткен WorldSkills Shanghai 2026 чемпионатында да біздің студенттер өз таланттарын көрсетті.
Руслан Нестеренко әлем чемпионатының бағдарламасына алғаш рет енгізілген «Ұшқышсыз авиациялық жүйелер» құзыреті бойынша қола жеңіп алды. Кәсібилік медальдарын Ағыбай Мұхаметжан («Веб-технологиялар»), Нодирбек Рустамханов («Сантехника және жылыту»), Вадим Витковский («Дәнекерлеу технологиялары»), Дарья Мельник («Өнеркәсіптік дизайн»), Бағыжан Қойшыбаев («Графикалық дизайн»), сондай-ақ Рамазан Нұрлан мен Денис Панин («Мехатроника») алды. Камила Алиева «Цифрлық интерактивті медиа дизайны» құзыреті бойынша «Best of Nation» наградасын алды. Бұл чемпионатта Қазақстанды 31 құзырет бойынша 33 колледж студенті таныстырды.

Халықаралық стандарттар – біліктіліктерді танудың негізі
Халықаралық интеграцияның келесі деңгейі – халықаралық салалық және кәсіби стандарттарды тікелей білім беру процесіне енгізу.
Бұл жұмысқа білім беру бағдарламаларының халықаралық салалық және/немесе кәсіби талаптарға сәйкестігін бағалау рәсімінен өткен 27 колледж қатысуда.
Халықаралық аккредиттеу қорытындысы бойынша 100-ден астам педагог пен 300-ден астам студент халықаралық деңгейде танылған сертификаттар мен аккредиттеулер алды.
Даярлау мұнай-газ саласындағы OPITO және IWCF, құрылыс және энергетикадағы NCCER, есеп және аудит саласындағы ACCA, дәнекерлеу ісіндегі IIW (KazWeld), токарлық істегі City & Guilds, инженерия мен IT-дегі ABEEK және басқа да халықаралық ұйымдар мен жүйелердің талаптарын ескере отырып жүзеге асырылады.
Бұл кадрларды даярлаудың философиясын түбегейлі өзгертеді. Егер бұрын негізгі міндет түлектің ұлттық талаптарға сәйкестігін растау болса, бүгінде оның кәсіби құзыреттерін халықаралық координаттар жүйесінде растау мүмкіндігі барған сайын маңызды бола түсуде.
Жеке бағыт – бес колледжде іске асырылып жатқан Certiport (Pearson) стандарты бойынша пилоттық жоба: APEC PetroTechnic, Талдықорған жоғары политехникалық колледжі, Алматы құрылыс колледжі, Ақтөбе жоғары политехникалық колледжі және Astana Polytechnic.
Жоба аясында 75 студент оқудан өтті, олардың 15-і халықаралық IT-сертификаттарды сәтті алды. Бұл маңызды практикалық нәтиже, өйткені цифрлық құзыреттер бүгінде заманауи еңбек нарығының әмбебап тілі болып табылады.

Қазақстандық педагогтердің халықаралық мойындалуы
ТжКБ жүйесінің халықаралық интеграциясы тек студенттердің ұтқырлығы мен сертификатталуында ғана көрінбейді. Педагогтердің өздерінің жетістіктері барған сайын байқала түсуде.
2022 жылдан бастап Еуропалық оқыту қорының үйлестіруімен ТжКБ жүйесінде іске асырылып жатқан Еуропалық Одақтың «Орталық Азиядағы шебер жастар үшін диалог пен іс-қимыл» (DARYA) өңірлік жобасы педагогикалық тәжірибе алмасу және заманауи білім беру практикаларын енгізу үшін қосымша мүмкіндіктер жасайды.
Жоба аясында Павлодар облысының Б. Ахметов атындағы жоғары педагогикалық колледжінің оқытушысы Гүлмира Мешітбаева «Бастауыш білім беру» мамандығы бойынша студенттерді даярлауда SCAFFOLD-карталарды қолдану тәжірибесін ұсынып, ETF New Learning Award 2026 халықаралық конкурсының INSPIRATION AWARD сыйлығының иегері атанды. Әдістеме студенттерге цифрлық технологияларды тиімді пайдалануға, әртүрлі деңгейдегі бейнелер мен тапсырмалары бар білім беру жобалары мен сайттарды әзірлеуге мүмкіндік береді. Жасалған жобалар педагогтердің әдістемелік қолдауы ретінде пайдаланылуы мүмкін және ата-аналарға арналған ұсынымдарды қамтиды. 2026 жылдың мамырында Гүлмира Мешітбаева өз тәжірибесін Брюссельдегі халықаралық конференцияда ұсынды.
Тағы бір мысал – Н. Бекбосынов атындағы Маңғыстау энергетикалық колледжінің оқытушылары Досан Қарашаев пен Айнұр Ондаханованың «ETF Green Skills Awards 2025» халықаралық жобасындағы жеңісі. Олардың әзірлемелері жасыл технологияларды дамытудағы заманауи білім беру бағдарламаларының рөліне, жаңартылатын энергия көздерін оқу процесіне тиімді енгізуге және болашақ мамандардың экологиялық құзыреттерін қалыптастыруға арналды. Конкурсқа 50-ден астам елден 250-ден астам кандидат қатысты. Қазақстандық педагогтер іріктеудің барлық кезеңдерінен өтіп, үздік бес жобаның қатарына енді. Марапаттау рәсімі Туриндегі политехникалық университет базасында ұйымдастырылған халықаралық конференция аясында өтті.
Мұндай жетістіктер қазақстандық педагогтердің тәжірибесі халықаралық кәсіби деңгейде қызықты екенін көрсетеді.

Қытаймен жаңа серіктестіктер және бірлескен инфрақұрылымды дамыту
Халықаралық ынтымақтастықтың жеке бағыты – «Бір белдеу, бір жол» бастамасы аясында Қытаймен өзара іс-қимыл.
Ағымдағы жылдың мамыр айында ҚХР-дың Шэньси провинциясында «Бір белдеу, бір жол» бастамасы аясында техникалық және кәсіптік білім беру саласында тәжірибе алмасудың 10-шы халықаралық конференциясы өтті. Қазақстандық делегация кәсіптік білім беруді дамыту, колледждердің өнеркәсіптік кәсіпорындармен өзара іс-қимылы және бірлескен білім беру жобаларын іске асыру мәселелерін талқылауға қатысты. Конференцияның негізгі нәтижелерінің бірі Саламат Мұқашев атындағы Атырау жоғары политехникалық колледжі, ҚХР-дың серіктес колледжі және өнеркәсіптік кәсіпорын арасында «Qinling Workshop» оқу-өндірістік шеберханасын құру және одан әрі дамыту туралы үшжақты келісімге қол қою болды.
Қазақстандық ТжКБ жүйесі үшін бұл жоба ерекше практикалық маңызға ие. «Qinling Workshop» білімді, халықаралық тәжірибені және өндірістің нақты қажеттіліктерін біріктіретін алаңға айналуға тиіс. Негізгі назар практикаға бағытталған оқытуға, заманауи технологияларды меңгеруге, тағылымдамаларды ұйымдастыруға және студенттердің кәсіби құзыреттерін арттыруға аударылады. Өндірістік жағдайларға жақын жағдайларда оқыту студенттерге теориялық білімді бекітуге ғана емес, сонымен қатар заманауи технологиялармен және жабдықтармен жұмыс істеудің практикалық дағдыларын игеруге мүмкіндік береді.
Шеберхана сондай-ақ қытайлық әріптестермен тәжірибе алмасу және академиялық ұтқырлықты дамыту үшін мүмкіндіктер жасайды. Болашақта жинақталған тәжірибе басқа да техникалық бағыттар бойынша ұқсас оқу-өндірістік алаңдарды құру кезінде пайдаланылуы мүмкін. «Qinling Workshop» – білім мен өндірісті интеграциялаудың практикалық тетігі, заманауи экономиканың талаптарына сәйкес мамандарды даярлауға ықпал етеді.
Конференцияның тағы бір маңызды қорытындысы қазақстандық колледждердің кәсіптік білім беру саласындағы «Бір белдеу, бір жол» Альянсының құрамына кіруі болды.
Альянсқа Астана қаласының Көлік және коммуникациялар жоғары колледжі, Саламат Мұқашев атындағы Атырау жоғары политехникалық колледжі, Астана қаласының техникалық колледжі және Ақтөбе жоғары политехникалық колледжі кірді.
Альянстың негізгі міндеттері кәсіптік білім беру саласында тәжірибе алмасу, студенттер мен педагогтердің академиялық ұтқырлығын дамыту, тағылымдамаларды ұйымдастыру, бірлескен білім беру жобаларын іске асыру және колледждердің кәсіпорындармен өзара іс-қимылын нығайту болып табылады.
Біздің колледждердің Альянс жұмысына қатысуы және «Qinling Workshop» жобасын іске асыру кадрларды даярлау сапасын арттыру және қазақстандық колледждердің халықаралық байланыстарын кеңейту үшін қосымша мүмкіндіктер жасайды.
Алдағы кезеңнің маңызды міндеті – қол жеткізілген уағдаластықтардың практикалық жалғасын қамтамасыз ету: шеберхананы дамыту, академиялық ұтқырлықты кеңейту, тағылымдамаларды ұйымдастыру, педагогтердің даярлығын жетілдіру және жұмыс берушілермен өзара іс-қимылды нығайту.
«Qinling Workshop» және қазақстандық колледждердің «Бір белдеу, бір жол» Альянсына қатысуы осы бағыттағы маңызды қадамдар болып табылады.

Келесі кезең – шетелдік филиалдар және қос дипломды білім беру
Бүгінде ТжКБ жүйесінің халықаралық интеграциясы бірте-бірте жаңа кезеңге – шетелдік серіктестердің Қазақстанда институционалдық қатысуына көшуде.
2027 жылға қарай басым бағыттар бойынша шетелдік колледждердің, мектептердің және шеберханалардың бес филиалын ашу жоспарланып отыр, олардың қатарында IT, гастрономия және тағам өндірісі, құрылыс, жеңіл өнеркәсіп, машина жасау, көлік және логистика және басқа да салалар бар.
Мәселен, Астана қаласы әкімдігінің Техникалық колледжі мен Чунцин энергетикалық колледжі (ҚХР) арасында қос диплом алумен бірлескен оқу бағдарламасын іске асыру туралы маңызды келісімге қол қойылды. Бұл маңызды қадамға бір жылдық жүйелі келіссөздер мен жемісті бірлескен жұмыс алдын алды. Келісім аясында студенттер екі диплом алуға, академиялық ұтқырлық бағдарламаларына қатысуға, халықаралық тәжірибе алуға және өздерінің кәсіби құзыреттерін жаңа деңгейде дамытуға мүмкіндік алады.
Атап өткен жөн, бұл халықаралық ынтымақтастықты нығайтуға және біздің студенттерге жаңа мүмкіндіктер беруге бағытталған маңызды бастама.
Сонымен қатар бірлескен білім беру бағдарламаларын және қос дипломды білім беруді іске асыру үшін нормативтік базаны қалыптастыру көзделіп отыр.
Бұл халықаралық ынтымақтастықты тек ұтқырлық және қысқа мерзімді бағдарламалар арқылы ғана емес, сонымен қатар кадрларды даярлаудың қазақстандық жүйесінің ішінде де бекітуге мүмкіндік береді.
Студент үшін бұл бірлескен бағдарламалар бойынша білім алу, заманауи әдістемелер мен жабдықтарды пайдалану, шетелдік оқытушылармен өзара іс-қимыл жасау және елден тыс жерде кеңірек танылатын біліктіліктерді алу мүмкіндігін білдіреді.
Халықаралық интеграция адам капиталына инвестиция ретінде
Осы бағыттардың барлығы – академиялық ұтқырлық, шетелдік тағылымдамалар, халықаралық чемпионаттар, салалық аккредиттеулер, сертификаттау, бірлескен шеберханалар, педагогтердің халықаралық конкурстарға қатысуы және шетелдік ұйымдардың филиалдарын құру – бір жүйелі жұмыстың элементтері болып табылады.
Оның мақсаты халықаралық келісімдердің санын сол қалпында арттыру емес. Басты нәтиже маманның даярлық сапасының қаншалықты өзгеретінімен және оның құзыреттерінің заманауи еңбек нарығының талаптарына қаншалықты сәйкес келетінімен өлшенеді.
Бүгінде Қазақстан ТжКБ моделін қалыптастырып отыр, онда студент оқу барысында халықаралық тәжірибе ала алады, шетелдік кәсіпорында практикадан өте алады, өз құзыреттерін халықаралық сертификатпен растай алады, халықаралық чемпионатқа қатыса алады және жаһандық экономикада кәсіби мансабын жалғастыра алады.
Сонымен қатар халықаралық ынтымақтастық ел ішінде де тиімділік береді. Шетелдік тәжірибе студенттер мен педагогтермен бірге колледждерге оралады, жаңа білім беру бағдарламаларына, әдістемелерге, стандарттарға және практикалық оқытуды ұйымдастыру тәсілдеріне айналады.
Басты бағдар – отандық техникалық және кәсіптік білім беру жүйесін түлектің дипломы, дағдылары мен біліктілігі халықаралық кәсіби кеңістікте түсінікті және бәсекеге қабілетті болатындай етіп реттеу. Колледждердің жаһандық білім беру және өндірістік өзара іс-қимылы неғұрлым кең болса, жас мамандардың кәсіби өсуі, жұмысқа орналасуы және одан әрі дамуы үшін соғұрлым көп мүмкіндіктер ашылады.
Келесі кезең – жинақталған тәжірибені жүйелі деңгейде бекіту: халықаралық аккредиттеуді кеңейту, академиялық ұтқырлық ауқымын ұлғайту, бірлескен білім беру бағдарламалары мен қос дипломды оқытуды дамыту, шетелдік білім беру ұйымдары мен кәсіпорындарды кадрларды даярлауға тарту.
Осылайша, халықаралық интеграция техникалық және кәсіптік білім беруді сапалы жаңартудың және елдің адам капиталының бәсекеге қабілеттілігін арттырудың негізгі факторларының біріне айналуда.
Ақзира ҚАСЫМОВА,
Қазақстан Республикасы Оқу-ағарту министрлігінің
техникалық және кәсіптік білім департаментінің директоры
АННОТАЦИЯ
Система ТиПО Казахстана проходит этап масштабной интеграции в международное образовательное пространство. Заключаются соглашения с зарубежными колледжами, учащиеся и педагоги преподаватели проходят стажировки в странах Европы и Азии. Планируется открытие филиалов зарубежных колледжей, школ и мастерских. Казахстанские студенты уверенно выступают на мировых чемпионатах WorldSkills, демонстрируя высокие результаты.

Comments