Д. Серікбаев атындағы ШҚТУ инженерлік білімнің болашағы туралы халықаралық диалог орталығына айналды

Д. Серікбаев атындағы Шығыс Қазақстан техникалық университетінде CDIO Бүкіләлемдік бастамасының CDIO Asian Regional Meeting 2026 – Азиялық өңірлік кездесуі өтті. Осы деңгейдегі халықаралық іс-шара Орталық Азияда алғаш рет өткізілді. Кездесуді Қазақстан Республикасының Ғылым және жоғары білім министрлігінің қолдауымен ШҚТУ ұйымдастырды.

Кездесу Сингапур, Швеция, Ұлыбритания, Германия, Жапония, Үндістан, Малайзия, Вьетнам, Өзбекстан, Әзірбайжан және басқа да мемлекеттерді қоса алғанда, 15 елден келген университеттер мен сарапшылар қауымдастығының 50-ден астам өкілін біріктірді.

Негізгі тақырып «Жаңа буын инженериясы: академиялық орта, индустрия және жасанды интеллектің жаңа триадасы» болды. Бағдарлама пленарлық отырыстарды, сараптамалық сессияларды, дөңгелек үстелдер мен практикалық семинарларды қамтыды. Қатысушылар инженерлік білім беру бағдарламаларын жаңартуды, жобалық және практикаға бағытталған оқытуды дамытуды, университеттердің өнеркәсіппен өзара іс-қимылын, индустриялық серіктестермен білім беру бағдарламаларын бірлесіп жобалауды және инженерлерді даярлау кезінде жасанды интеллектті жауапкершілікпен қолдануды талқылады.

Халықаралық кездесуді аша отырып, Д. Серікбаев атындағы ШҚТУ басқарма төрағасы – ректоры Сәуле Рахметуллина:

«Біз мықты іргелі негізді сақтап, сонымен бірге студенттерге білімді нақты инженерлік ортада қолдану мүмкіндігін жасауымыз керек. Сондықтан академиялық ортаның, индустрияның және жасанды интеллектің өзара іс-қимылы бүгінде ерекше маңызды. Инженерлік білім студенттерге нақты өнімдерді, процестер мен жүйелерді жобалау, жасау және енгізу мүмкіндігін беруге тиіс», – деп атап өтті.

Кездесудің негізгі бағыттарының бірі Қазақстандағы инженерлік білім берудің ұлттық моделін талқылау болды. CDIO халықаралық тәсілі инженерлік өнімнің толық өмірлік циклін ескере отырып маман даярлауды көздейді: идеяны қалыптастыру мен жобалаудан бастап іске асыру мен пайдалануға дейін. Бұл іргелі білімді, кәсіби құзыреттерді, жобалық жұмысты және нақты өндірістік міндеттерді шешуді біріктіруге мүмкіндік береді.

Бастаманың дамуы және инженерлерді даярлаудың заманауи тәсілдері туралы CDIO Бүкіләлемдік бастамасының тең директоры, Турку қолданбалы ғылымдар университетінің проректоры Юха Контио әңгімеледі. Ол инженерлік білімнің трансформациясына және жасанды интеллектті білім беру процесіне мағыналы интеграциялауға ерекше назар аударды.

Өңірлік кездесудің практикалық форматы әртүрлі елдердің инженерлік мектептерінің өкілдеріне тәжірибе алмасуға, нақты білім беру шешімдерін талқылауға және одан әрі халықаралық ынтымақтастық мүмкіндіктерін айқындауға мүмкіндік берді.

Д. Серікбаев атындағы ШҚТУ – CDIO Бүкіләлемдік бастамасының толыққанды қатысушысы мәртебесіне ие Қазақстандағы жалғыз жоғары оқу орны.

Кездесу жаңа технологиялық жағдайларда инженерлерді даярлау қалай өзгеруі керектігін талқылаудың халықаралық алаңына айналды. «Университет – индустрия – жасанды интеллект» байланысы инженерлік білімге және нақты өндірістік міндеттерді шешу үшін заманауи технологияларды қолдана алатын мамандарды даярлаудың жаңа тәсілдерін қалыптастырады.