Жас жазушылар мерекесі!

Тараз қаласындағы Қазақстан халқы Ассамблеясының Достық үйінде «Тараз бойымен серуен» атты Тұңғыш жастар әдеби байқауы жеңімпаздарын салтанатты түрде марапаттау рәсімі өтті.

Ежелгі Тараз – тек кітап құмарлар қаласы ғана емес, сонымен бірге шығармашылық мекені де! Қала оқырмандары Президент Тоқаевтың үндеуіне үн қоса отырып, жас дарындардың туындылары алғаш рет тоғысқан бірегей кітап-альманахқа қол жеткізді деп айтуға толық негіз бар. Мұндай альманах бұған дейін тек Таразда ғана емес, бүкіл Қазақстан бойынша алғаш рет жарық көріп отыр!

«Тараз бойымен серуен» жастар әдеби байқауын Қазақстан Жазушылар одағы Әдеби байланыстар жөніндегі кеңесінің Орыс тілді әдебиет жөніндегі кеңесі Жамбыл облыстық секциясы ұйымдастырып, өткізді.

Кәсіби әдебиетшілерден, ғалым-филологтардан және еңбек сіңірген мұғалімдерден құралған қазылар алқасы 6-11 сынып оқушыларының 100-ге жуық өлеңдері мен прозалық мәтіндерін сараптады. Байқаудың ұйымдастырушысы – ҚР Жазушылар одағының мүшесі, Халықаралық қазақ ПЕН-клубының мүшесі Александр Загрибельный.

Байқау өскелең ұрпақтың әдеби шығармашылыққа деген зор қызығушылығын көрсетті. Алғашқы тақырып – «Тараз бойымен серуен» – туған қалаға және оның бай тарихына деген сүйіспеншілік, сондай-ақ ондағы көрікті жерлер мен тұрып жатқан қызықты тұлғалар туралы сыр шертеді. Екінші тақырып – «Биз жаспыз» – авторларға өздері үшін өзекті мәселелердің кең ауқымы бойынша ой толғауға мүмкіндік берді.

Қазылар алқасы алғашқы байқау сәтті өтті деп есептейді, өйткені ол бірқатар жас дарындардың есімін айқындап берді. Олардың қатарында: Руслан Шубин мен Виктория Абышева (№40 гимназия), Дария Еркін мен Евгений Терехин (№7 гимназия) бар.

Бас жүлдені иеленген Алина Дабылдың (№3 мектеп-лицей) «Ұмытпайтын қала» («Город, который помнит») повесі өзінің күтпеген сюжеттік бұрылыстарымен және жоғалған естелікті қайта жаңғырту шиеленісінің нанымды көркемдік шешімімен таңғалдырды. Тоғызыншы сыныптың жас оқушысы сирек кездесетін даналық пен адам санасының туған жермен байланысын терең интуитивті түсіне білу қабілетін көрсетті. Ол алғашқы сезімдердің оянуын және жақын адамының тағдыры үшін жауапкершілікті нәзік жеткізе білген. Повесть ешқандай патетикасыз және асқақ сөздерсіз-ақ, кейде ересек жазушылардың өзі жете бермейтін отансүйгіштіктің ең жоғары деңгейін тудырады.

Бұл – байқаудың айтулы табысы және оқырман үшін үлкен қуаныш! Ал бұл альманах Тараздың барлық мектептері мен кітапханаларында оқылатын болады. «Современное образование» журналының оқырмандарына Алина Дабылдың повесінен үзінді ұсынамыз.

Жас автордың қызығушылықтары өте сан алуан. Ол жақсы сурет салады, кітапты көп оқиды және IT-бағдарламалаумен айналысады. Әртүрлі жағдайларды, мысалы, криминалистика саласындағы оқиғаларды талдағанды ұнатады. Космосты, психологияны зерттейді, сонымен қатар каллиграфиямен де шұғылданады. Негізінен классикалық әдебиетті оқиды, атап айтқанда: Оскар Уайльд, әпкелі-сіңлілі Бронтелер, Джек Лондон және Эрих Мария Ремарк сияқты авторларды, сондай-ақ заманауи жазушы Николас Спарксты сүйіп оқиды. Алдағы уақытта Виктор Гюго, Александр Дюма, Федор Достоевский және Джордж Оруэллдің шығармаларын оқуды жоспарлап отыр. Болашақта өз фильмдері мен туындыларын дүниеге әкелуді, үнемі ізденіп, дамып отыруды армандайды.