ШҚТУ Бранденбург университетімен қос дипломды магистрлік бағдарлама туралы келісімге қол қойды. Ғылым және жоғары білім министрілігінің баспасөз қызметіне сілтеме жасап, «Современное образование» журналы хабарлайды.
Д. Серікбаев атындағы ШҚТУ Басқарма Төрағасы-Ректор Сәуле Рахметуллина Германияға сапары аясында Бранденбург Коттбус-Зенфтенберг техникалық университетіне барды.
Екіжақты кездесу аясында Бранденбург техникалық университеті қазақстандық әріптестеріне экскурсия ұйымдастырып, ғылыми технологиялық жетістіктерін таныстырды.
«Қазір «Казцинк» ЖШС демеушілігімен ШҚТУ металлургия және пайдалы қазбаларды байыту мектебінің 3 студенті мен 2 қызметкері BTU-да тағылымдамадан өтуде. Бұл бағдарлама BTU білім алушылары мен қызметкерлерінің оқу шарттарымен және зерттеу жобаларымен танысуды, модельдеу, лазерлік және Дәнекерлеу технологиялары бойынша практикалық сабақтарды қамтиды», - деді Сәуле Жәдігерқызы.
Бранденбург техникалық университетімен өткен жиналыс барысында тау-кен-металлургия саласындағы академиялық артықшылық орталығын құру жобасы талқыланып, металлургия бойынша дипломдық магистрлік бағдарлама туралы шартқа қол қойылды.
Шығыс Қазақстан техникалық университеті Бранденбург техникалық университетімен 2020 жылы байланыс орнатқан.
Құжатқа қол қою рәсімі екі университеттің достығын нығайтып, болашақ ғалымдар үшін жаңа мүмкіндіктерге жол ашатыны сөзсіз.
