Қазақстан мен Қытай арасындағы техникалық және кәсіптік білім беру (ТжКБ) саласындағы ынтымақтастықты тереңдету
29 қыркүйекте Пекин маңында орналасқан Чанпин кәсіптік мектебінде Кәсіптік білім беруді инновациялық дамытудың Қытай-Қазақстан альянсын құруға арналған конференция және Екі елдің өнеркәсіп пен білім интеграциясын дамыту форумы өтті.
Осы жылдың көктемінде Теміртау жоғары политехникалық колледжінде Альянсты құру туралы меморандумға қол қойылды. Оны құрушылар ретінде осы колледж және Пекиндегі Чанпин кәсіптік училищесі бастамашы болды. Ұйымның құрамына Қазақстан Республикасының тағы 16 колледжі кірді.
Альянсты құру Қазақстанның Орталық Азияның ТжКБ жүйесіндегі инженерлік-техникалық құзыреттілік пен инновациялар орталығы ретіндегі рөлін нығайтуға бағытталған. Бұл кадрлық әлеуетті дамытуға, халықаралық серіктестікті кеңейтуге және озық технологияларды енгізуге ықпал етеді.
Іс-шара кәсіптік білім беру саласындағы жаңа ынтымақтастық платформасын құруға, өнеркәсіп пен оқытудың терең интеграциясына жәрдемдесуге, сондай-ақ жоғары білікті мамандарды бірлесіп даярлауға бағытталды. Оған Қазақстан мен Қытайдың білім беруді басқару органдарының, кәсіптік оқу орындарының және салалық кәсіпорындардың жүзден астам өкілі қатысты.
Екі тарап кәсіптік білім беру саласындағы ынтымақтастықты тереңдетуге және жаңа буын кадрларын бірлесіп даярлауға бірауыздан ниет білдірді.
«Бүгін біздің алдымызда әлемдік стандарттарға сай мамандарды даярлау бойынша ауқымды міндеттер тұр. Осы Альянсты құру – үздік тәжірибелерді енгізуге, тәжірибе алмасуға және жастарымыз үшін жаңа перспективалар ашуға мүмкіндік беретін елдеріміздің арасындағы байланыстарды нығайтуға бастайтын маңызды қадам», – деп атап өтті Қарағанды облысы білім басқармасының басшысы Дулат Жекебаев.
Конференцияда Чанпин кәсіптік мектебі білім беру тобының партия комитетінің хатшысы Чжэн Яньцю құрылымды дамыту жоспарын таныстырды. Ол екі елдің оқу орындары мен кәсіпорындарының ресурстарын біріктіруді, сондай-ақ практикалық жобалар арқылы тәжірибе алмасуды және білім стандарттарын бірлесіп әзірлеуді ілгерілетуді ұсынды.
Өз кезегінде Альянстың тең құрылтайшыларының бірі болған Теміртау жоғары политехникалық колледжінің директоры Салтанат Ақбергенова екіжақты серіктестік туралы көзқарасымен бөлісті:
«Біздің колледж және өңірдің бүкіл ТжКБ жүйесі үшін осы жобаға қатысу – бұл жаңа деңгейге жетудің бірегей мүмкіндігі. Біз инновациялық технологияларды трансферттеуге, курстарды бірлесіп әзірлеуге және практикалық тағылымдамаларды ұйымдастыруға бағытталғанбыз, бұл түлектеріміздің бәсекеге қабілеттілігін айтарлықтай арттырады».
Қытай мен Шанхай ынтымақтастық ұйымының (ШЫҰ) кәсіптік-техникалық білім беру саласындағы ынтымақтастық орталығының басшысы Ми Цзин Альянстың ШЫҰ ресурстарымен тиімді интеграциясына жәрдемдесуге дайын екенін мәлімдеді.
Өнеркәсіп пен білім интеграциясын дамыту форумында Қытай мен Қазақстанның оқу орындарының өкілдері мамандықтар мен оқу бағдарламаларын әзірлеудің практикалық тәжірибесімен бөлісті. Lenovo, BYD және Huibo Robotics сияқты ірі кәсіпорындардың өкілдері сала қажеттіліктеріне сүйене отырып, оқу орындары мен бизнес арасындағы өзара іс-қимылдың нақты жолдарын талқылады.
Қатысушылар Альянсты құру сенімді ынтымақтастық платформасына айналып, Қазақстан мен Қытай арасындағы одан да тығыз достық және экономикалық байланыстарды қалыптастыруға үлес қосады деп бірауыздан атап өтті.
Comments