04.01.2024.
Бөкетов университетінің педагогика факультетінде ашылған бірегей кітапхана Қарағанды қаласының педагогтарының барлығына қолжетімді болып, тәулік бойы оқырман қауымға қызмет көрсетеді, «Современное образование» журналы Ғылым және жоғары білім министрлігінің баспасөз қызметіне сілтеме жасай отырып хабарлайды.
Озық технологиямен қамтамасыз етілген оқу кітапханасы білім алмасу орталығына, диалог алаңына айналды.
Заманауи үлгідегі оқу кітапханасында білім беру ресурстарына ашық қолжетімділікті ұйымдастыру басты назарға алынған. Қорды сақтауға арналған қауіпсіздік құралдары мен RFID-жапсырмалары орнатылғандықтан қызметтің қолжетімділігі арта түседі.
Кітапханада ерекше студенттерге арналған арнайы үстелдер мен ортопедиялық орындықтар бар.
«Педагогика факультетінің оқу кітапханасы 400 шаршы метрді алып жатыр. Қазіргі таңда кітап қоры 53 000 дананы құрайды. Мұнда өнер мен дизайнға арналған және әдістемелік басылымдар, көркем әдебиеттер қоры жинақталған. Кітапхана арнайы абонементпен, электронды ресурстар залымен жабдықталған», – дейді Гаухар Әбдіғұлова.
