ҚР ҒЖБМ Ұлттық тестілеу орталығы еліміздің білім беру орталықтарымен бірлесіп ҰБТ-ға дайындалуға арналған тегін онлайн-сабақтарды бастайды, «Современное образование» журналы Ғылым және жоғары білім министрлігінің баспасөз қызметіне сілтеме жасай отырып хабарлайды.
Онлайн сабақтар ірі республикалық білім беру орталықтарымен бірлесіп әзірленді. Сабақтар білім беру орталықтарының YouTube арналарында және Instagram парақшаларында тікелей эфирде өткізіледі. Онлайн сабақтардың барлық эфирі талапкерлер кез-келген уақытта көре алуы үшін сақталады.
«Ғылым және жоғары білім министрлігі тестілеу кезінде ғана емес, оның басталуына дейін де қолайлы жағдай жасау үшін жұмыс жүргізіп жатыр. Түлектердің ҰБТ-ға дайындығын Ұлттық тестілеу орталығы білім беру орталықтарымен бірлесіп, төртінші жыл өткізіп отыр. Өткен жылы 600-ге жуық сағат онлайн сабақтар өткізілді. Оған еліміздің барлық өңірлерінің мектеп түлектері қатысып, ҰБТ пәндері бойынша дайындықтан өтті. Биыл 20-дан астам орталық сабақ беретін болады. Жоба бюджет қаражатын жұмсамай іске асырылғанын атап өткім келеді», – деді ҚР ҒЖБМ Ұлттық тестілеу орталығының директоры Руслан Емелбаев.
Осылайша, Ұлттық тестілеу орталығы мен ірі білім беру орталықтары түлектерге емтиханға сәтті дайындалуға көмектеседі. Талапкерлерге арналған онлайн-сабақтар осы оқу жылының соңына дейін жалғасады.
Тегін онлайн сабақтар мына кесте бойынша өткізіледі:
Qazbilim орталығы «Qazbilim.tv» Youtube каналында тікелей эфирде қазақ тілінде күн сайын сағат 20.00-де (Нұр-сұлтан қаласының уақыты бойынша);
Educon Dostyk «DostyQbilim» YouTube арнасында тікелей эфирде әр сейсенбі күні сағат 19.00-де қазақ тілінде, сағат 20.00-де орыс тілінде;
Zerdeli-әр сейсенбі мен бейсенбі күндері сағат 20.00-де «Zerdeli.kz» YouTube арнасында;
Sabaq online әр сенбі сайын сағат 15.00-де «Sabaq online» YouTube арнасында;
Samga жұма күні сағат 20.00-де «Samga online» YouTube арнасында;
Daryn online әр сейсенбі, сәрсенбі, бейсенбі және жұма күндері сағат 18.00-де «Daryn online» YouTube арнасында тікелей эфирде дайындық сабақтарын өткізеді.
Сонымен қатар Ұлттық тестілеу орталығы ҰБТ-ға дайындық үшін онлайн тестілеуді іске қосты. Байқау сынағын өткізу технологиясы негізгі ҰБТ технологиясына сәйкес келеді.
Оқу жылының басында ҰТО сайтында тест тапсырмалары құрастырылған әдебиеттер тізімі мен тест жоспары; «Қазақстан тарихы» және «Дүниежүзі тарихы» пәндері бойынша 100 тарихи дата тізімі; «Информатика» пәнінен терминдер тізімі; «Қазақ әдебиеті» және «Орыс әдебиеті» бойынша әдеби шығармалар тізімі жарияланды.
