BioStart – Қозыбаев университетінің бірінші курс студенттері үшін

М. Қозыбаев академигінің 95 жылдығына орай BioTech Alliance студенттік ғылыми қоғамы биотехнология мамандығының студенттеріне арналған BioStart интерактивті ғылыми-ағартушылық іс-шарасын ұйымдастырды.

Іс-шара барысында бірінші курс студенттері биотехнологияның заманауи бағыттарымен, кәсіби және ғылыми дамудың перспективаларымен, сондай-ақ оқудың алғашқы жылдарынан бастап студенттерге ашылатын мүмкіндіктермен танысты. Кездесу аясында олар биотехнологияның қандай салаларды қамтитынын және оның медицинада, ауыл шаруашылығында, тамақ өнеркәсібінде, экологияда және басқа да бағыттарда қандай рөл атқаратынын білді.

Халықаралық тағылымдамалардан өту, академиялық ұтқырлық бағдарламаларына қатысу, ғылыми жобаларға, конференциялар мен конкурстарға қатысу, сондай-ақ зерттеу жұмыстарын жүргізу мүмкіндіктеріне ерекше назар аударылды. Екінші және үшінші курс студенттері осындай іс-шараларға қатысу барысында жинақтаған жеке тәжірибелерімен бөлісіп, волонтерлік қызмет, студенттік бастамалар және университеттегі кәсіби даму жолдары туралы әңгімеледі.

Бағдарламаның интерактивті бөлімі ретінде ғылыми квест ұйымдастырылды. Оның барысында бірінші курс студенттері өз білімдерін тексеріп, командалық жұмыс дағдыларын көрсетті және биотехнология әлемімен қызықты форматта танысты.

«BioTech Alliance барлық қызығушылық танытқан студенттерді студенттік ғылыми қоғамға қосылуға, зерттеу дағдыларын дамытуға, жобаларға қатысуға және ғылымдағы алғашқы қадамдарын бірінші курстан бастап жасауға шақырады», – деп атап өтті Халықаралық кампустың қауымдастырылған профессоры Юлия Бызова.

BioStart іс-шарасы студенттер арасында тәжірибе алмасуға, ғылыми қызметті насихаттауға және бірінші курс студенттерін университеттің белсенді өміріне тартуға арналған маңызды алаңға айналды..