Абай атындағы ҚазҰПУ Францияның жетекші университеттерімен стратегиялық серіктестігін нығайтуда

Лотарингия университетінде (Франция) төрт университеттің — Абай атындағы Қазақ ұлттық педагогикалық университеті мен үш жетекші француз жоғары оқу орнының — басшыларының стратегиялық отырысы өтті. Ол халықаралық академиялық ынтымақтастықты кеңейтуге, бірлескен білім беру және ғылыми бастамаларды дамытуға, сондай-ақ Абай атындағы ҚазҰПУ жанындағы Лотарингия университеті филиалының стратегиялық серіктестік нысанындағы қызметін нығайтуға арналды.

Абай атындағы ҚазҰПУ делегациясының құрамына Басқарма Төрағасы — Ректор Болат Тілеп, Сорбонна–Қазақстан институтының және Абай атындағы ҚазҰПУ жанындағы Лотарингия университеті филиалының директоры Айнұр Сабитова және Абай атындағы ҚазҰПУ халықаралық ынтымақтастық департаментінің директоры Баян Сапарғалиева кірді. Стратегиялық отырысқа Лотарингия университетінің президенті Элен Буланже (Hélène Boulanger), Реймс Шампань — Арденны университетінің президенті Кристоф Клеман (Christophe Clément), сондай-ақ Пуатье университетінің президенті атынан профессор Фредерик Ришар (Frédéric Richard), және Франция жоғары оқу орындарының вице-президенттері қатысты.

Стратегиялық отырыстың күн тәртібіндегі орталық орынды француз университеттерімен стратегиялық серіктестік нысанындағы Абай атындағы ҚазҰПУ жанындағы Лотарингия университеті филиалын одан әрі дамыту мәселелері алды. Студенттер мен оқытушылардың академиялық ұтқырлығын кеңейтуге, бірлескен және қос дипломды білім беру бағдарламаларын іске асыруға, ғылыми-зерттеу өзара іс-қимылын нығайтуға және университеттік ынтымақтастықтың тұрақты халықаралық моделін қалыптастыруға ерекше назар аударылды.

Стратегиялық отырыстың негізгі нәтижесі төрт университеттің стратегиялық ынтымақтастық нысанындағы филиалды іске асыру саласындағы Ниет туралы хатына (Letter of Intent on Strategic Cooperation) қол қоюы болды. Құжат қазақстандық және француз университеттерінің білім беру, ғылыми және институционалдық әлеуетін біріктіретін Абай атындағы ҚазҰПУ жанындағы Лотарингия университеті филиалы шеңберінде ұзақ мерзімді көпжақты стратегиялық серіктестікті дамытуға тараптардың ортақ мүдделілігін бекітеді.

Осы бастаманы іске асыру Абай атындағы ҚазҰПУ-дың қазақстандық және еуропалық жоғары білім беру жүйелерінің өзара іс-қимылын қамтамасыз ететін, Қазақстан мен Франция арасындағы білім беру және ғылыми байланыстардың дамуына ықпал ететін халықаралық академиялық алаң ретіндегі ұстанымын нығайтуға бағытталған.

Стратегиялық отырыс барысында тараптар еуропалық және халықаралық конкурстарға, гранттық бастамалар мен бағдарламаларға, соның ішінде Erasmus+ бағдарламасына бірлесіп қатысудың маңыздылығын да атап өтті. Мұндай өзара іс-қимыл академиялық алмасу мүмкіндіктерін кеңейтуге, қосымша қаржыландыру тартуға және бірлескен білім беру, зерттеу және институционалдық жобаларды іске асыруға мүмкіндік береді. Көзделіп отырған стратегиялық серіктестік моделі әрбір университеттің академиялық бейінін, институционалдық мүмкіндіктерін және халықаралық ынтымақтастықта жинақтаған тәжірибесін ескере отырып, олардың белсенді қатысуына негізделген.

Лотарингия университеті стратегиялық серіктестік нысанындағы филиалдың жалпы үйлестіруін жүзеге асырады, Абай атындағы ҚазҰПУ жанындағы филиалды одан әрі дамытуға басым назар аудара отырып, халықаралық білім беру және ғылыми бастамаларды іске асырудағы өз тәжірибесіне сүйенеді. Реймс Шампань — Арденны университеті мен Пуатье университеті өздерінің академиялық бағыттары мен мамандану салаларына сәйкес филиалдың бірлескен білім беру және ғылыми-зерттеу жобаларын әзірлеуге және іске асыруға қатысады. Өзара іс-қимылдың нақты бағыттары барлық серіктестермен бірлесіп, өзара мүдделер, басымдықтар және қолда бар мүмкіндіктер ескеріле отырып айқындалады.

Абай атындағы ҚазҰПУ негізгі қазақстандық серіктес ретінде әрекет етеді, ұлттық деңгейде бірлескен қызметті үйлестіруді, академиялық ұтқырлықты дамытуды, білім беру және ғылыми бастамаларды іске асыруды, сондай-ақ оларды Қазақстан мен Орталық Азияның білім беру және ғылыми кеңістігіне интеграциялауды қамтамасыз етеді.

Ынтымақтастықтың мұндай форматы университеттердің институционалдық және зияткерлік ресурстарын біріктіруге, пәнаралық зерттеулерді дамытуға, озық академиялық практикалармен алмасуға және жоғары білім мен ғылымның жаһандық трансформациясы жағдайында сұранысқа ие жоғары білікті мамандарды даярлауға негіз қалайды.

Лотарингия университетінде өткен стратегиялық отырыс академиялық сенімге, өзара тәжірибе алмасуға, институционалдық сабақтастыққа және тұрақты нәтижелерге қол жеткізуге деген ортақ мүдделілікке негізделген ұзақ мерзімді көпжақты стратегиялық серіктестік ретінде Абай атындағы ҚазҰПУ жанындағы Лотарингия университеті филиалын қалыптастырудағы маңызды қадам болды.