Азаматтық авиация академиясы — 30 жыл: халықаралық жетістік және болашаққа бағыт

Азаматтық авиация академиясының 30 жылдығы – Қазақстанның бүкіл авиация саласы үшін маңызды оқиға. Отыз жыл ішінде Академия 1995 жылы құрылған шағын оқу орнынан еліміздің азаматтық авиациясының жетекші білім беру және ғылыми орталығына айналып, кәсіби стандарттарды айқындап, саланың даму бағдарына ықпал етіп келеді.

Шараға халықаралық ғалымдар, авиация саласының өкілдері, Қазақстан Республикасының Ғылым және жоғары білім министрлігі мен Көлік министрлігінің мамандары, Академияның серіктестері, авиациялық кәсіпорындардың басшылары, сондай-ақ бүгінде саланың әртүрлі бағыттарында жетекші қызмет атқарып жүрген түлектері қатысты. Мұндай кең ауқымды сарапшылардың қатысуы Академияның авиациялық кадрлар даярлаудағы стратегиялық орталық ретіндегі маңызын және халықаралық ынтымақтастық алаңы ретіндегі мәртебесін айқындады.

Академия жылдар бойы ұшқыштар, авиаинженерлер, әуе диспетчерлері, ұшу қауіпсіздігі мамандары және менеджерлер сынды мыңдаған жоғары білікті мамандарды даярлап келеді. Бүгінде Академия түлектері Қазақстанның және шетелдің азаматтық авиация құрылымдарында табысты еңбек етіп, жолаушылар қауіпсіздігін, әуе қатынасының тұрақтылығын және саланың технологиялық дамуын қамтамасыз етуде.

    30 жылдық аясында басты ғылыми оқиғалардың бірі офлайн және онлайн форматта өткен ISATECH’25 халықаралық симпозиумы болды. Симпозиумға Қазақстан, Әзербайжан, Вьетнам, Қытай, Қырғызстан, Латвия, АҚШ, Ресей, Тәжікстан, Түркия және Өзбекстаннан келген ғалымдар қатысты. Үш секцияға азаматтық авиацияның даму перспективалары, цифрландыру, инновациялық технологиялар, ұшу қауіпсіздігі және авиациялық тасымалдаудың тиімділігін арттыру мәселелеріне арналған 120-дан астам ғылыми баяндама іріктелді. Симпозиум халықаралық тәжірибе алмасудың, ғылыми ынтымақтастықты нығайтудың және жаңа авиациялық шешімдерді ілгерілетудің маңызды алаңына айналды.

Қонақтардың ерекше қызығушылығын «Азаматтық авиация академиясына 30 жыл» атты кітаптың таныстырылымы тудырды. Кітапта Академияның қалыптасу тарихы, негізгі жетістіктері, профессор-оқытушылардың еңбегі және түлектердің кәсіби табыстары баяндалған. Сондай-ақ тақырыптық көрмелер мен фотогалерея арқылы Академияның даму кезеңдерін кеңінен көруге мүмкіндік берілді.

Салтанатты шара барысында Қазақстан Республикасының Ғылым және жоғары білім министрі атынан құттықтау сөз жарияланып, Академияның авиациялық сала дамуына қосқан стратегиялық үлесі атап өтілді. Министр Саясат Нұрбек Академияның ауқымды жаңғыртудан өтіп, ICAO және EASA халықаралық стандарттарына негізделген даярлық жүйесін қалыптастырғанын, сондай-ақ ғылым, цифрландыру және жаңа технологиялар бағытында ірі орталыққа айналғанын ерекше атап өтті.

Сонымен қатар министр соңғы жылдары Академияда толыққанды даярлық жүйесінің қалыптасуы, кәсіби стандарттардың жаңартылуы, жаңа авиациялық мамандықтар Атласының әзірленуі, білім беруді цифрландыру, ғылыми зерттеулер, жасанды интеллект және ұшқышсыз жүйелер бойынша нақты қадамдар жасалғанын жеткізді.

Отыз жылдық мерейтой Академия үшін аяқталған кезең емес, жаңа белестің бастауы болды. Академия алдағы уақытта да білім беруде инновациялық технологияларды енгізіп, халықаралық әріптестікті нығайтып, ғылыми зерттеулерді дамытып, Қазақстанның азаматтық авиациясы үшін жоғары білікті жаңа буын мамандарын даярлауды жалғастырады.