Түркияның Ғылым және технологиялар университеті мен Азаматтық авиация академиясы бірігіп авиация мамандарын дайындайды

Азаматтық авиация академиясының делегациясы авиациялық білім беру мен білікті мамандар даярлау саласындағы халықаралық ынтымақтастықты кеңейту мақсатында Түркия Республикасына жұмыс сапарымен барды. Бұл сапар Академияның әлемдік білім беру кеңістігіндегі орнын нығайтуға бағытталған маңызды қадам болды.

Сапар аясындағы басты іс-шара Адана қаласында өтті. Мұнда Ғылым және технологиялар университетінің басшылығымен ресми кездесу ұйымдастырылып, тараптар авиациялық және инженерлік ғылымдар саласында ұзақ мерзімді серіктестік орнату мүмкіндіктерін талқылады. Келіссөздер барысында бірлескен білім беру бағдарламаларын іске қосу, академиялық және студенттік ұтқырлықты дамыту, сондай-ақ халықаралық ғылыми-зерттеу және қолданбалы жобаларға қатысу мәселелеріне ерекше назар аударылды.

Кездесу нәтижесінде Азаматтық авиация академиясы мен Түркияның жетекші технологиялық университеттерінің бірі арасында Өзара түсіністік туралы меморандумға қол қойылды. Бұл құжат тараптар арасындағы стратегиялық ынтымақтастықтың берік институционалдық негізін қалады.

Сапардың келесі кезеңі Анталия қаласында жалғасты. Делегация Aksu Uçak Bakım Teknolojisi Mesleki ve Teknik Anadolu Lisesi оқу орнының жұмысымен танысты. Бұл оқу орны әуе кемелеріне техникалық қызмет көрсету саласындағы мамандарды даярлаудың заманауи әрі тиімді үлгісін ұсына отырып, EASA Part-66/147 еуропалық стандарттарына толық сәйкес келеді. Оқу үдерісі Түркияның азаматтық авиация кәсіпорындарымен тығыз байланыста ұйымдастырылып, практикалық даярлыққа басымдық берілген.

Сапар барысында білім алушылардың кәсіби дағдыларын ерте кезеңнен қалыптастыруға мүмкіндік беретін оқу және материалдық-техникалық база жан-жақты зерттелді. Бұл тәжірибе Академия үшін кәсіби білім беруді жетілдіру тұрғысынан құнды болды.

Сонымен қатар делегация Испарта қаласында орналасқан ERAH Aviation Academy басшылығымен жұмыс кездесуін өткізді. Кездесу барысында ұшқыштарды практикалық даярлау, авиациялық персоналды академиялық және кәсіби оқыту тәжірибесі, сондай-ақ болашақтағы стратегиялық өзара іс-қимылдың перспективалары талқыланды.

Жалпы алғанда, Түркияға жасалған бұл жұмыс сапары Азаматтық авиация академиясының халықаралық серіктестігін кеңейтуге, озық тәжірибелермен алмасуға және Академияның халықаралық деңгейдегі беделін арттыруға елеулі үлес қосты.