Қазақстан мен Германия техникалық және кәсіптік білім беру саласындағы ынтымақтастықты кеңейтуде

Мемлекет басшысы Қасым-Жомарт Кемелұлы Тоқаевтың Германияға ресми сапары барысында екі елдің министрлері кәсіптік білім беру мәселелері бойынша кездесу өткізді, деп хабарлайды «Замануи білім беру» журналы ҚР ҒЖБМ баспасөз қызметіне сілтеме жасап. Қазақстанның оқу-ағарту министрі Жұлдыз Сүлейменова Германияның білім, отбасы, қарт азаматтар, әйелдер және жастар істері жөніндегі федералды министрі Карин Принмен ынтымақтастық перспективаларын талқылады.

Кәсіптік білім беруді дамыту Президенттің қазақстан-германдық бизнес-форумдағы сөйлеген сөзінің тақырыптарының біріне айналды.

Мемлекет басшысы Германияның дуальды жүйесін жоғары бағалап, ірі инвестициялық жобаларды іске асырумен тікелей байланысты Қазақстан-Германдық өнеркәсіптік құзыреттер орталықтарының желісін құруды ұсынды.

Серіктестік қазірдің өзінде практикалық негізге ие. Алматы құрылыс-техникалық колледжі көп жылдар бойы GROHE, KNAUF және BOSCH компанияларымен ынтымақтасып келеді. Оның базасында заманауи құзыреттілік орталықтары жұмыс істейді. KNAUF-пен 20 жылдан астам ынтымақтастық барысында екі мыңнан астам студент оқудан өтті.

Кездесуде министрлер дуальды оқытуды дамыту, педагогтер мен студенттер үшін тағылымдамалар ұйымдастыру, екі елдің колледждері арасында тәжірибе алмасуды талқылады. Мамандарды даярлаудың еңбек нарығының қажеттіліктеріне сай болуы үшін жұмыс берушілермен өзара іс-қимылға ерекше назар аударылды.

Кездесу қорытындысы бойынша министрлер техникалық және кәсіптік білім беру мен оқыту саласындағы ынтымақтастық туралы ниеттердің бірлескен декларациясына қол қойды. Кездесудің жеке тақырыбы кәсіптік білім берудегі цифрландыру және жасанды интеллектіні қолдану болды. Қол қойылған декларация бірлескен жобаларды кеңейтуге және колледж студенттері мен педагогтерінің кәсіби дамуының жаңа мүмкіндіктеріне негіз қалайды.