Азаматтық авиация академиясы Nis global conference 2025 форумында: ниш түлектері үшін жаңа мүмкіндіктер

Астанада автономды білім беру ұйымы «Назарбаев Зияткерлік мектептері» өткізетін халықаралық конференция – XIV NIS Conference 2025 өтуде. Биылғы форумның тақырыбы: «Цифрлық дәуірдегі мектеп білім беруі: негізгі үрдістер мен сын-қатерлер».

Форумға АҚШ, Ұлыбритания, Нидерланд, Финляндия, Аустралия, Гонконг елдерінен келген жетекші сарапшылар мен зерттеушілер, сондай-ақ Қазақстанның мемлекеттік құрылымдарының, жоғары оқу орындарының және ғылыми-зерттеу институттарының өкілдері – барлығы шамамен 1500 қатысушы жиналды.

Конференция аясында білім беруді цифрландыру жағдайындағы өзекті мәселелер – жасанды интеллектті қолдану, жаңа дағдыларды қалыптастыру, оқушылардың құзыреттерін бағалау және технологиялық өзгерістер дәуіріндегі мұғалімнің рөлі талқылануда.

Қазіргі әлем тез өзгеруде. Жасанды интеллект, цифрландыру және автоматтандыру өмірдің барлық салаларына еніп, авиация – бұл үрдістер ең қарқынды дамып жатқан бағыттардың бірі. Қазіргі заманғы ұшақтар интеллектуалды жүйелермен жабдықталған, оларды басқару терең білімді, ойлау икемділігін және жоғары жауапкершілікті талап етеді. Сондықтан авиация саласына жаңа буын – жас, амбициясы жоғары, технологияны жетік меңгерген мамандар қажет.

Осы мақсатта Азаматтық авиация академиясы форум жұмысына белсенді қатысып, жаңа буын авиациялық кадрларды даярлау стратегиясын таныстырды. Академия ректоры Б.К. Сейдахметов Назарбаев Зияткерлік мектептерінің түлектеріне арналған үшжылдық жеделдетілген білім беру траекториясын ұсынды.

Бұл бастама НИШ түлектеріне жаңа мүмкіндіктер ашады: бар болғаны үш жылда олар жоғары білім алып, азаматтық авиация сияқты беделді және жоғары технологиялық салада мансабын бастай алады.

Бағдарламаның артықшылықтары:

• Жоғары білім мазмұнын толық сақтай отырып, оқу мерзімін үш жылға дейін қысқарту;

  
  

• НИШ-та меңгерілген жалпы білім беру пәндерінің нәтижелерін тану;

  
  

• Ерте кезеңнен кәсіби авиациялық дайындыққа араласу мүмкіндігі;

  
  

• Авиация индустриясында мансапты жылдам бастау.

  
  

НИШ түлектері жоғары академиялық дайындық деңгейімен, сыни ойлау және зерттеу дағдыларымен ерекшеленеді, бұл оларды күрделі авиациялық мамандықтарды меңгеруге лайықты етеді.

Азаматтық авиация академиясы – дәстүр мен инновация үйлескен Қазақстандағы жетекші авиациялық білім беру орталығы. Оқу үдерісінде заманауи авиациялық тренажерлар, цифрлық симуляторлар, кеңейтілген шындық технологиялары және жобалық зертханалар қолданылады. Бұл студенттерге теориялық білімді тәжірибеде бірден қолдануға мүмкіндік береді.

Бүгін Академия Назарбаев Зияткерлік мектептерінің түлектерін Қазақстан авиациясының болашағының бір бөлігі болуға шақырады. Мұнда олар өз әлеуетін жүзеге асырып, беделді және серпінді салада мансап құрып, ұлттық авиацияның дамуына үлес қоса алады.