Сейфуллин университеті мен Беларусь мемлекеттік ауылшаруашылық академиясы аграрлық білім мен ғылым саласындағы ынтымақтастықты нығайтты

Минск, 2025 жылғы 2 қараша — С. Сейфуллин атындағы Қазақ агротехникалық зерттеу университетінің (ҚАТИУ) делегациясы Басқарма төрағасы – ректор Қанат Тіреуовтің басшылығымен Беларусь мемлекеттік ауыл шаруашылығы академиясына (БМАША) ресми сапар жасады. Академия — Октябрь Революциясы мен Еңбек Қызыл Ту ордендерінің иегері, Беларусь Республикасының Горки қаласында орналасқан.

ҚАТИУ делегациясының құрамына Ержан Ахметов – Инжиниринг және тамақ технологиялары институтының директоры, Алмагүл Мерғалимова – Энергетика институтының директоры, Нұрдос Каринбаев – Жастар саясаты және әлеуметтік жұмыс департаментінің директоры және Асем Саурамбекова – Халықаралық ынтымақтастық және академиялық ұтқырлық департаменті директорының орынбасары кірді.

Бұл сапар Беларусь Республикасы мен Қазақстан Республикасының жоғары оқу орындары мен ғылыми-зерттеу институттары арасындағы Ғылыми-білім беру консорциумының қызметін үйлестіру жөніндегі X жұмыс комиссиясының отырысы аясында өтті. Кездесудің негізгі мақсаты – білім, ғылым және аграрлық технологиялар саласындағы екіжақты ынтымақтастықты одан әрі нығайту.

Тараптар бірлескен білім беру бағдарламаларын әзірлеу мен іске асыру, ғылыми зерттеулер жүргізу, сондай-ақ инновациялық технологиялар мен агроөнеркәсіптік кешенге кадрлар даярлау саласында тәжірибе алмасу мәселелерін талқылады.

ҚАТИУ ректоры Қанат Тіреуов 1840 жылы құрылған, Беларусьтегі ең көне аграрлық жоғары оқу орны болып саналатын Беларусь мемлекеттік ауыл шаруашылығы академиясының ғылыми және практикалық әлеуетін жоғары бағалап, алдағы келісімдер екі университет арасындағы ұзақ мерзімді әрі өзара тиімді ынтымақтастықтың берік негізіне айналатынына сенім білдірді.

Сапар барысында Қанат Тіреуов ветеринария ғылымдарының кандидаты, доцент Виталий Великанов бастаған академия басшылығымен кездесті. Тараптар бірлескен білім беру бағдарламаларын жүзеге асыру, студенттер мен оқытушылардың академиялық ұтқырлығын дамыту, сондай-ақ ғылыми конференциялар мен бірлескен жарияланымдарды ұйымдастыру бағыттарын талқылады.

Ерекше назар «Аквакультура және су биоресурстары» мамандығы бойынша бірлескен бакалавриат бағдарламасын әзірлеуге аударылды. Бұл бағдарлама балық шаруашылығы, су биоресурстарын тиімді пайдалану және гидробионттарды өсіру технологиясы салаларында мамандар даярлауға бағытталған.

Визит барысында Seifullin University делегациясы академияның оқу корпустары, ғылыми зертханалары, тәжірибе алқаптары және оқу шаруашылықтарының инфрақұрылымымен танысты. БМАША — Шығыс Еуропадағы ең көне аграрлық оқу орны, құрамында 10 факультет, 26 білім беру бағыты және 15 000-нан астам студенті бар.

Қанат Тіреуов белорус әріптестерінің тәжірибесі Қазақстан үшін аграрлық білімді жаңғырту, инновациялық технологияларды енгізу және саланың кадрлық әлеуетін дамыту тұрғысынан ерекше маңызды екенін атап өтті.

Кездесу соңында тараптар білім мен ғылым салаларындағы интеграцияны тереңдетуге, сондай-ақ аграрлық саладағы заманауи сын-қатерлерге жауап беретін бірлескен ғылыми бастамалар мен академиялық ұтқырлық бағдарламаларын дамытуға бағытталған ұзақ мерзімді серіктестікке өзара мүдделілік танытты.