Балабақшадағы ұлттық ойындар: практикалық тәжірибе

Баланы салауатты, өз халқының салт-дәстүрін білетін және әлеуметтік бейімделген тұлға етіп тәрбиелеудің ең тиімді әрі табиғи әдістерінің бірі — ғасырлар бойы халық үшін ерлік, ептілік пен ұрпақтар сабақтастығының мектебі болған ұлттық ойындар. Астана қаласының № 31 балабақшасында бұл ойындар дене шынықтыру сабақтарының ажырамас бөлігіне, сондай-ақ тәрбиеленушілердің ата-аналары да үлкен қызығушылықпен қатысатын спорттық мерекелердің негізіне айналған.

Қазіргі білім беру процесінде балаларды ұлттық дәстүр рухында тәрбиелеуге, олардың физикалық тұрғыдан мықты және өз халқының мәдениетімен рухани байланыста болуына деген сұраныс барған сайын айқындала түсуде. Бұл міндетті шешудің ең қолжетімді әрі пәрменді құралдарының бірі ретінде денсаулықты нығайтатын, мінезді қалыптастыратын, өзара көмек көрсету мен ата-баба тарихына деген құрметке үйрететін ұлттық қимыл-қозғалыс ойындары танылады.

Ұлттық ойындар дене шынықтыру сабақтарында жиі қолданылады. Астана қаласының № 31 «Ақ сұңқар» балабақшасында жарыс әрекеттері арқылы «Адал азамат» тәрбие бағдарламасы жүзеге асырылады. Сабақ барысында балалардың белсенділігі артып, көңіл-күйі көтеріледі, олардың ұлттық ойындарға деген сүйіспеншілігі мен достық сезімі оянып, өзара қарым-қатынасы жақсарады және жеңіске деген ұмтылысы қалыптасады. Ал спорттық мерекелерде балабақша мен ата-аналар арасындағы ынтымақтастық дамып, ең бастысы – балалар мен ата-аналар арасындағы өзара түсіністік тәрбиеленеді..

Ұлттық ойындар үдеріске балаларды да, ата-аналарды да тарта отырып, ұрпақтар арасындағы көпірге, отбасын нығайту және балаларда негізгі құндылықтарды, Отанға деген сүйіспеншілікті және оның мәдени мұрасын қалыптастыру құралына айналады.

№ 31 «Ақ сұңқар» балабақшасының педагогтары отбасылық спорттық демалысты ұйымдастырудың практикалық тәжірибесімен әрқашан бөлісуге дайын. Әріптестерге өздерінің мектепке дейінгі мекемелерінде төмендегі іс-шара сценарийін пайдалануды ұсынамыз.

Мереке сценарийі

«Ұлттық ойын — ұлт қазынасы»

Көрнекіліктер: асықтар, түрлі-түсті бояулар, ою салынған қағаздар, арқан, асық ату баннері.

Жүргізуші: Сәлеметсіздерме, құрметті әріптестер! Біз «Ұлттық ойын — ұлт қазынасы» атты отбасылық спорттық сайысымызды бастаймыз. Олай болса, ортаға қатысушы отбасыларды шақырамыз.

Отбасылар музыкамен ортаға шығады.

Жүргізуші: Құрметті қатысушылар, бүгінгі сайысқа қош келдіңіздер. Біздің балабақшада «Адал азамат» біртұтас тәрбие бағыты бойынша бүгін ұлттық ойындармен спорттық сайыс ұйымдастырылып отыр. Ұлттық ойындар — ата-бабамыздан бізге жеткен, өткен мен бүгінді жалғайтын, баға жетпес байлығымыз бен қазынамыз. Сайысымызды бастамас бұрын, еліміздің патриоттары ретінде мемлекеттік әнұранымызды шырқайық.

Әнұран шырқалады.

Балалар «Отан менің жүрегім» әнін орындайды.

1. «Таныстыру»

Әр отбасы ортаға шығып, өз отбасын таныстырады.

2. «Асық жинау» ойыны

Ортаға екі отбасы шығып билейді, ортаға екі түсті асықтар шашылады. Әуен тоқтағанда, анасы мен әкесі баланы көтеріп, екі данадан асықтарды жинайды. Қай отбасы тезірек жинап бітсе, сол отбасы жеңімпаз.

3. «Тақия» ойыны

Үш отбасы оң жаққа, қалған үш отбасы сол жаққа қатар қол ұстасып тұрады. Тақия соңғы қатысушыда болады. Бірінші тұрған қатысушы қатысушылар арасымен барып, соңғы қатысушының басында тұрған тақияны өз басына киеді, сол кезде келесі қатысушы жүгіреді.

4. «Әдемі ою» ойыны

Бала ортаға шығып, қағаздағы оюды алып жүгіріп барып, тақтаға іледі. Анасы жүгіріп келіп, оюдың сырт жағын сызып шығады, ал әкесі оюды бояйды.

5. «Арқан тартыс» ойыны

Екі отбасынан ортаға шығып, арқанды тартады. Қай отбасы күшпен арқанды өз жағына қарай тартып кетсе, сол отбасы жеңімпаз.

6. «Асық ату» ойыны

Баннерде тізіліп тұрған асықтарды бала 3 рет, анасы 2 рет, әкесі 1 рет атады. Құлатқан асық санына қарай ұпай қосылады.

Есептеу жүріп жатқанда, барлық қатысушылар кез келген балалар әуенімен би флешмобына қатысады. Құрылу. Марапаттау.

Ұсынылған спорттық мереке сценарийі – ұлттық дәстүрлердің мектепке дейінгі мекеме мен отбасының күнделікті өміріне қаншалықты үйлесімді сіңе алатынының мысалы. № 31 «Ақ сұңқар» балабақшасының тәжірибесі халықтық ойындарды жаңғырту мен насихаттау күрделі ресурстарды қажет етпейтінін, бірақ таңғаларлық тәрбиелік әсер беретінін дәлелдейді: ата-аналар мен балаларды жақындастырады, балаларда салауатты бәсекелестік рухын, ұлттың мәдени кодына құрметті және белсенді өмір салтына деген сүйіспеншілікті қалыптастырады. Жұмыстың мұндай түрлерін қолдану көптеген балабақшалар үшін жақсы дәстүрге айналады және ұлттық құндылықтар бос сөз емес, өмірдің табиғи бөлігі болатын ұрпақты өсіруге көмектеседі деп сенеміз.

М. А. ӘБЕНОВА,

Астана қаласы № 31 «Ақ сұңқар» балабақшасы

---

АННОТАЦИЯ

В статье описывается сценарий спортивно-семейного соревнования «Ұлттық ойын – ұлт қазынасы» («Национальная игра – сокровище нации»), разработанный инструктором по физической культуре М. А. Абеновой в детском саду № 31 «Ақ сұңқар» г. Астаны. Мероприятие организовано в рамках единого воспитательного направления «Адал азамат» и ставит целью повышение активности детей, пробуждение любви к национальным играм, формирование стремления к победе и укрепление сотрудничества между дошкольным учреждением и семьёй. Материал будет полезен педагогам дошкольного образования, инструкторам по физической культуре и родителям, заинтересованным в национальном воспитании детей.